Maktab hayoti

San’atda ranglar orqali inson o‘z ichki dunyosini namoyon etadi. Rassom qalbidagi orzular, hislar va xayollar mo‘yqalam orqali qog‘ozga ko‘chadi. Shu bois har bir chizilgan rasm – bu nafaqat tasvir, balki u bir hikoya, bir kechinma, bir olamdir. “Ranglar jilosi” nomli ijodiy ishimizda biz ranglar uyg‘unligi, tabiat go‘zalligi va inson fantaziyasining cheksizligini aks ettirishga harakat qildik. Bu rasm orqali tomoshabin qalbida iliq hislar uyg‘otish, uni go‘zallikni ko‘ra bilishga chorlash asosiy maqsadimizdir.

🎤 Yosh iste’dod sahnada Maktabimizda o‘tkazilgan tadbir davomida o‘quvchimiz o‘zining musiqiy iqtidorini namoyon etdi. U ijro etgan qo‘shiq barcha tomoshabinlarda katta taassurot qoldirdi. Qalbdan kuylangan musiqa yig‘ilganlarning olqishiga sazovor bo‘ldi. Bu kabi chiqishlar o‘quvchilarning iste’dodini rivojlantirish va ularni qo‘llab-quvvatlashda muhim ahamiyat kasb etadi. Yosh iste’dodlarimizning kelajagi porloq bo‘lishiga ishonamiz.

Maktabimizda tashkil etilgan teatr sinfi mahorat darsida o‘quvchilar jadidlar hayoti va faoliyati haqida sahna ko‘rinishi namoyish etdilar. Ushbu chiqish orqali ular o‘zlarining aktyorlik mahoratini sinab ko‘rish bilan birga, tarixiy bilimlarini ham mustahkamladilar. Sahna ko‘rinishida jadidlarning ilm-ma’rifat yo‘lida qilgan fidokorona xizmatlari, xalqni uyg‘otish va taraqqiyot sari yetaklashdagi o‘rni yorqin ifodalandi. O‘quvchilar obrazlarni mahorat bilan ijro etib, tomoshabinlarda katta taassurot qoldirdilar. Bunday mahorat darslari o‘quvchilarning ijodiy fikrlashini rivojlantiradi va ularni milliy qadriyatlarimizga hurmat ruhida tarbiyalaydi.

“Ijod maskani” doirasida mahorat darsi bo‘lib o‘tdi! ✨ Bugun Oqdaryo tuman 14-son Bolalar musiqa va san’at maktabida “Ijod maskani” loyihasi doirasida rubob sinfi o‘quvchilari uchun amaliy mahorat darsi tashkil etildi. Mazkur dars Negmatov Abror Akramovich — Samarqand ixtisoslashtirilgan san’at maktabining oliy toifali katta o‘qituvchisi tomonidan olib borildi. Dars jarayonida o‘quvchilar rubob ijrochiligi bo‘yicha qimmatli bilim va amaliy ko‘nikmalarga ega bo‘lib, san’atga bo‘lgan qiziqishlari yanada oshdi. Dars yakunida ustozimizga ko‘rsatgan mehnatlari, samimiy yondashuvi va yoshlarga bo‘lgan e’tibori uchun tashakkurnoma topshirildi. 🎶 Ustozimizga ijodiy faoliyatlarida ulkan muvaffaqiyatlar tilaymiz!

Oqdaryo tuman 14-son Bolalar musiqa va san'at maktabida o‘quvchilarning milliy qadriyatlar va umumxalq bayramlariga bo‘lgan qiziqishini oshirish maqsadida “Milliy qadriyatlarim — faxrim” mavzusida san’at va madaniyat ko‘rgazmasi hamda rassomlik tanlovi tashkil etildi. Tanlovda o‘quvchilar tomonidan umumxalq bayramlari va milliy an’analarni aks ettiruvchi rasmlar taqdim etildi. Eng yaxshi ijodiy ishlar ko‘rgazmaga qo‘yildi hamda faol o‘quvchilar rag‘batlantirildi.

Maktabimizning faol hayotidan lavhalar